Кожны год 18 мая супрацоўнікі музеяў усяго свету адзначаюць сваё прафесійнае свята – Міжнародны дзень музеяў. З гэтай нагоды супрацоўнікі музея Максіма Багдановіча падрыхтавалі і правялі 19 мая 2018 г. квэст «Вандроўка ў мінулае». Удзельнікамі квэсту сталі студэнты УА «Гродзенскі дзяржаўны ўніверсітэт імя Я.Купалы», вучні 9 класа ДУА «Сярэдняя школа № 28 г.Гродна», вучні 11 класа ДУА «Гімназія №2 г.Гродна», а таксама турысты з г.Мінска.
Заданні і пытанні да квэсту, як і правільныя адказы на іх, былі схаваны ў музейных экспазіцыях, каманды гульцоў павінны былі іх знайсці і выканаць. Кожная каманда атрымала папку ўдзельніка квэсту «Вандроўка ў мінулае», дзе і павінна была напісаць адказы на ўсе 23 заданні! З вялікім захапленнем і задавальненнем каманды выконвалі кожнае наступнае заданне. Падчас гульні ўдзельнікі даведаліся, па якім адрасе пражывала сям’я Багдановічаў у Гродне, як называлася фотамайстэрня, дзе быў зроблены першы фотаздымак Максіма Багдановіча, як называецца адзіны прыжыццёвы зборнік вершаў паэта, для якой дзяўчыны Максім Багдановіч падрыхтаваў свой рукапісны зборнік «Зеленя». Цікавымі і ў пэўнай ступені складанымі аказаліся пытанні: сярод прапанаваных аўтографаў розных пісьменнікаў знайсці аўтографы, якія належалі М.Багдановічу, з прапанаваных фотаздымкаў вызначыць тыя, на якіх – Максім Багдановіч. Толькі разгадаўшы рэбус, можна было правільна адказаць на пытанне: як называецца музычны інструмент у інтэр’еры «Гасцёўні», з дапамогаю люстэрка трэба было прачытаць слова і назваць тэхніку, у якой зроблены габелен «Флора», што вісіць на сцяне мемарыяльнага пакоя.
Квэст «Вандроўка ў мінулае» падараваў усім не толькі станоўчыя яскравыя эмоцыі, але і новыя веды. У падарунак кожны ўдзельнік атрымаў паштоўку з эмблемай квэсту і аўтографам Максіма Багдановіча.
Віншуем усіх з Міжнародным днём музеяў, жадаем поспехаў і новых творчых дасягненняў!
