У межах святкавання Міжнароднага дня роднай мовы супрацоўнікі Музея Максіма Багдановіча пабывалі ў гасцях у ДУА «Сярэдняя школа № 38 г. Гродна» і пазнаёмілі вучняў шостых класаў з дзяцінствам і гарадзенскім перыядам жыцця паэта, расказалі пра яго бацькоў – Адама Ягоравіча і Марыю Апанасаўну Багдановічаў, пра асаблівасці выхавання дзяцей.
З дапамогай відэапрэзентацыі вучні здзейснілі віртуальную вандроўку па мемарыяльных пакоях музея, убачылі асабістыя рэчы паэта, фотаздымкі, зборнік вершаў «Вянок». Шасцікласнікі ахвотна ўспомнілі і хорам прачыталі верш Максіма Багдановіча «Зімой», пазнаёміліся таксама з вершамі паэта «На чужыне» і «Слуцкія ткачыхі».
Да спадобы школьнікам прыйшоўся аповед навуковага супрацоўніка музея пра кветку васілёк, якая стала вобразам-сімвалам Беларусі менавіта дзякуючы М.Багдановічу. З задавальненнем вучні згулялі ў віктарыну і даведаліся, як гучаць і пішуцца назвы некаторых кветак, ягад і раслін на рускай і беларускай мовах.
Напрыканцы дзеці зрабілі сваімі рукамі паштоўку з кветкай-васільком з фаамірану. На памяць кожны школьнік атрымаў кветку-сімвал Беларусі з надрукаванымі на паштоўцы радкамі з верша «На чужыне»:
Вакол мяне кветкі прыгожа красуюць.
Маркотна між іх я хаджу адзінок,
Аж бачу - мне сіняй галоўкай ківае
Наш родны, забыты ў цяні васілёк.
.jpg)
У ходзе мерапрыемства вучні праявілі зацікаўленасць да беларускай мовы і літаратуры, да паэзіі Максіма Багдановіча, а таксама паказалі свае творчыя здольнасці.
Шчыры дзякуй настаўніцы беларускай мовы і літаратуры Івашкевіч Жанне Антонаўне за арганізацыю гэтага свята!