Халодная, ясная ноч…
Звонка хрумчыць сняжком,
Ідучы мне насустрач, дзяўчына.
«Як Вас завуць?» – пытаюся я.
<Сягоння ж усе гадаюць>.
І яна няголасна кажа:
«Аня».
М.Багдановіч
Кожны чалавек – гэта цэлы свет. І каб з гэтым светам пазнаёміцца, трэба задаць зусім простае пытанне: «Як Вас завуць?» З гэтага пытання можа пачацца шчырае сяброўства або вялікае каханне. Імя – першы падарунак, які чалавек атрымлівае ў жыцці, і многія людзі вераць, што яно ўплывае на характар і лёс чалавека.
А ці ведаеце вы, што…
- Імёнамі (жаночымі і мужчынскімі) называюць стыхійныя бедствы, напрыклад, тайфуны. Аднак адно імя выключана са спісаў імёнаў для тайфунаў і іншых стыхійных бедстваў. Гэта імя прынцэсы Дыяны.
- Моду на імя Ларыса ўвёў А.М. Астроўскі. Гэтае імя было модным у Расіі двойчы: адразу пасля выхаду спектакля па п’есе Астроўскага «Бесприданница», дзе ролю Ларысы выконвала В.Камісаржэўская, і другі раз, калі выйшаў на экраны ў 1936 годзе кінафільм па гэтай жа пъесе. На 100 дзяўчынак імя Ларыса давалася 15-ці з іх.
- Знакаміты мастак Пабла Пікаса вядомы ўсім. Але не ўсе ведаюць поўны набор яго імя і прозвішча: Пабла Дыега Хазэ Францыска дэ Паула Хуан Непамукена Крыспін Крыспіяна дэ ла Сантысіма Трынідад Руіз і Пікасо. Усяго ў ягоным імені і прозвішчы 93 літары.
- Індзеец племені квакіутль, беручы грошы ў доўг, можа пакінуць у заклад сваё імя. Пакуль ён не верне доўг, да яго ніхто не звяртаецца па імені.
- У Старажытным Рыме існавала традыцыя даваць асабістае імя толькі чатыром старэйшым сынам, а астатнім у якасці асабістага імя маглі служыць парадкавыя лічэбнікі: Quintus (пяты), Sextus (шосты), Septimus (сёмы) і гэтак далей. З часам гэтыя імёны сталі агульнаўжывальнымі.
- Тры самыя папулярныя імёны ў нованароджаных беларускіх хлопчыкаў у 2020-м – Міхаіл, Максім і Марк. Самыя папулярныя імёны для нованароджаных дзяўчынак у 2020-м – Сафія, Аліса і Марыя. Цікава, што ў перыяд з 2000 да 2020 года хлопчыкаў часцей за ўсё называлі Максімам, Арцёмам і Мікітам, а дзяўчынак – Анастасіяй, Дар’яй, Марыяй.
- Імя Максім з’явілася ў Старажытным Рыме. З лацінскай мовы «Максімус» перакладаецца як «самы вялікі, найвялікшы». З цягам часу ў кожнага народа з’явілася свая форма імя Максім: у Італіі – гэта Масіма, у Іспаніі – Максіма, у Нямеччыне – Максімільян, у Грэцыі – Максімас, і нават у японцаў ёсць свой Макісіму.
У вершах Максіма Багдановіча мы сустракаем даволі многа імёнаў. Найчасцей паэт ужывае імя Ганна: Аня, Анечка, Аніта. Узгадаем надзвычай арыгінальны, першы ва ўсходнеславянскай паэзіі «чацвярны акраверш» паэта:
Ах, как умеете Вы, Анна,
Не замечать, что я влюблен.
Но все же шлю я Вам не стон,
А возглас радостный: Осанна!
Не менш вядомым, у тым ліку і дзякуючы песні ў выкананні знакамітых «Песняроў», з’яўляецца імя Вераніка з аднайменнай паэмы Максіма Багдановіча:
Ізноў пабачыў я сялібы,
Дзе леты першыя прайшлі:
Там сцены мохам параслі,
Вясёлкай адлівалі шыбы.
Усе ў пылу. І стала мне
Так сумна, сумна ў цішыне.
Я ў сад пайшоў… Ўсё глуха, дзіка,
Усё травою зарасло.
Няма таго, што раньш было,
І толькі надпіс «Вэраніка»,
Па ліпе ўрэзаны ў кары,
Казаў вачам аб той пары.
А ці зможаце вы адгадаць іншыя імёны з вершаў паэта? Паспрабуйце разгадаць нашыя рэбусы!
