Першыя мяккія цацкі сваім дзецям клапатлівыя бацькі шылі з кавалкаў тканіны, набівалі іх саломай, конскім воласам і ватай. У XVI ст. цацкі сталі вырабляць на заказ. Лялькі служылі манекенамі для моднай вопраткі ў тыя часы. Такія цацкі былі вельмі дарагімі і належалі арыстакратам. І толькі ў XIX ст. з’явілася масавая вытворчасць мяккіх цацак.
Прамысловая гісторыя мяккай цацкі бярэ свой пачатак з 1870-х гадоў у Германіі. У шматлікіх жаночых часопісах пачалі друкаваць выкрайкі і парады па вырабу мяккіх цацак сваімі рукамі. У 1879 г. жыхарка аднаго нямецкага горада Гінген Маргарэт Штайфф, з дзяцінства прыкаваная да інваліднай каляскі, пашыла некалькі мяккіх забавак у падарунак на Каляды для сваіх пляменнікаў. Цацкі мелі такі поспех у суседзяў, што на Маргарэт літаральна рынуўся шквал заказаў.
У 1901 г. Маргарэт запатэнтавала свайго мішку, які абапіраўся на ўсе чатыры лапы. А годам пазней з’явіўся першы, гэтак цяпер любімы ва ўсім свеце плюшавы мішка. Мастак Рыхард Штайфф, адзін з пляменнікаў Mаргарэт, прыдумаў сумясціць канструкцыю мяккай цацкі і лялькі. У вырабленага па эскізах мішкі пярэднія і заднія лапкі рухаліся на шарнірах.
Цікавыя факты пра мяккія цацкі:
- Існуе мядзведзь–вандроўнік. У сувязі з памылкай, якую дапусціла паштовая служба, мішка праехаў у пасылцы 329 тысяч кіламетраў. Два разы ён пабываў у Мексіцы, аб’ехаў усю Амерыку, пяць разоў вяртаўся ў Аўстралію. Толькі па заканчэнні 3 гадоў ён усё ж такі дасягнуў адрасата.
- Плюшавы мішка, якога ў ЗША называюць мішкам Тэдзі, створаны ў гонар прэзідэнта ЗША Тэадора Рузвельта, які на паляванні пашкадаваў параненага мядзведзя.
- Самы дарагі мішка Тэдзі быў выкананы з махеру ў 1929 г. і быў набыты адным калекцыянерам за 90 тысяч даляраў.
- У свеце існуе каля дваццаці музеяў плюшавых мішак.
У адным з мемарыяльных пакояў Музея Максіма Багдановіча можна ўбачыць некалькі мяккіх цацак, у тым ліку і мішак. Самы знакаміты з іх – мішка Васенька – цацка ручной работы вышынёй 34,6 см, пашытая з тканіны карычневага колеру. Вядома, што ў дзяцінстве ў беларускага паэта Максіма Багдановіча таксама быў мішка Васенька.
