Дзень беларускага пісьменства ў нашай краіне адзначаецца штогод у першую нядзелю верасня.
4 – 5 верасня 2021 года ў г.Капыль Мінскай вобласці адбудзецца XХVIII Дзень беларускага пісьменства.
З нагоды гэтага свята ў нашым музеі падрыхтавана выстаўка «Зноў ухваляю родную зямлю...».
Паэтычны вобраз Радзімы сатканы не толькі з апісання маляўнічых краявідаў, але і з усведамлення гісторыі і традыцый роднай зямлі, асэнсавання сябе ў дыялозе з выбітнымі асобамі, з дзіцячых успамінаў, асабістых эмоцый і перажыванняў, адбітак якіх нясуць знаёмыя рэчы і мясціны.
Кожны пісьменнік адчувае творчую неабходнасць паказаць усяму свету прыгажосць роднай вёскі або горада, раскрыць духоўнае хараство людзей, якія тут жывуць, апісаць родны куток зямлі ў кантэксце лёсу цэлай краіны.
Пра свет і пра сябе, пра свой радавод распавядае Я.Брыль у кнігах «Блакітны зніч» (2004) і «Парастак» (2006). З аповеду аб родных Біскупцах Д.Бічэль пачынае кнігу ўспамінаў «Хадзі на мой голас» (2008). І.Адамовіч вёску Верцялішкі называе сваёй калыскай і прысвячае ёй зборнік «Зямля дабрыні» (2009). Л.Кебіч адлюстравала ў кнізе «На беразе белай ракі» (2010) сваю малую радзіму – пасёлак Краснасельскі. Артыкулы, напісаныя падчас літаратурна-краязнаўчых вандровак па Слонімшчыне, увайшлі ў кнігу А.Іверса «З глыбінь жыцця» (2012). З пяшчотай успамінае вёску, «адкуль у свет пайшла», Л.Шалешка ў зборніку «На кроснах вясны» (2016). Па ласкавых хвалях Нёмана, па абрысах старадаўняй Каложы, па свечках вясновых каштанаў, па высакародным алені з залатым крыжам паміж рог мы пазнаём г.Гродна ў вершах, якія ўвайшлі ў зборнікі Л.Кебіч «Трыялеты, тэрцыны, рандэлі» (2020), М.Шаўчонак «Белыя свечкі каштанаў» (2005), Д.Бічэль «Гускі вяртаюцца» (2019), А.Брусевіча «Падаю ў неба» (2006), В.Смолкі «Зоркаму сэрцу» (2015), А.Паўлоўскай «За небакраем» (2015).
Увазе наведвальнікаў прадстаўлены фотаздымкі Д.Бічэль, Ю.Голуба, Ю.Гуменюка, М.Шаўчонак і іншых, аўтограф ліста Я.Брыля да Д.Бічэль, кнігі з дароўнымі надпісамі аўтараў.
Выстаўка працуе штодзённа з 10.00 да 18.00, акрамя панядзелка.
Кошт уваходнага квітка – 10 кап.
Запрашаем!