У Музеі Максіма Багдановіча з 2 лістапада працуе выстаўка “Дні ідуць, праходзяць годы…”, прымеркаваная да Дня нараджэння Максіма Багдановіча.
Час няўмольны, але талент і спадчына сапраўднага мастака застаюцца непадуладнымі яму, жывуць у вечнасці. Пра неўміручасць творчасці і памяць, якую нясуць праз дзесяцігоддзі, нагадвае нам знакавая дата ў календары беларускай культуры – 9 снежня. Менавіта ў гэты дзень у 1891 годзе нарадзіўся Максім Багдановіч – паэт-наватар, чый талент узняў беларускае прыгожае пісьменства на класічныя вышыні, напоўніў яго неўміручай глыбінёй і непаўторным хараством. Нягледзячы на кароткае зямное жыццё (09.12.1891–25.05.1917) ён пакінуў неацэнную творчую спадчыну і стаў класікам беларускай літаратуры. Выстаўка, прымеркаваная да Дня нараджэння песняра, запрашае ўспомніць і пераасэнсаваць яго ўнёсак у нацыянальную культуру.
Да ўвагі наведвальнікаў на выстаўцы прадстаўлены:
кнігі “Вянок” М. Багдановіча (факсімільнае (1981) і мініяцюрнае (1994) выданні), “Максім Багдановіч” (2021) з серыі “Жыццё знакамітых людзей Беларусі”, “Шляхі” Н. Ватацы (1986), “У бязмежную даль” С. Панізніка (1996), “Дарогамі Максіма” А. Бачылы (1971).
аўтограф песні “Маладыя гады” (1994), ноты песні “Вянок Багдановіча” (2011) з дароўным надпісам Я. Петрашэвіча.
Запрашаем на выстаўку!
Кошт – 20 капеек!
Музей працуе з 10.00 да 19.00, панядзелак – выхадны.