Дрэва – адзін з самых старажытных матэрыялаў. Яшчэ ў старадаўнія часы людзі ацанілі даступнасць драўніны і прастату яе апрацоўкі. Першымі ўзорамі разьбы па дрэву лічацца паганскія драўляныя ідалы. Аднак ужо ў XVI ст. разьба па дрэву заняла важнае месца ў штодзённым жыцці. Прыгожым разным арнаментам пачалі аздабляць прадметы мэблі і драўляны посуд. З цягам часу з’явіліся спецыяльныя інструменты, якія дазвалялі зрабіць узор больш дэтальным і вытанчаным. Дэкаратыўнай разьбой упрыгожвалі не толькі прадметы побыту – арцелі рэзчыкаў пераўтваралі храмы, палацы, дамы багатых гараджан у сапраўдныя творы мастацтва. Што ўжо казаць пра куфры, шкатулкі, табакеркі, лыжкі, цацкі, шалёўкі і аканіцы!
Разьба па дрэву і сёння шырока прымяняецца ў інтэр’ерным і ландшафтным дызайне. Драўляная мэбля з разьбой выдатна глядзіцца ў класічным інтэр’еры. Разьба выяўляе прыгожую тэкстуру і натуральны колер дрэва, а высакародныя завіткі на шафе або ўзоры на кухонным гарнітуры не толькі надаюць інтэр’еру самабытнасць, але і робяць яго больш душэўным і ўтульным.
Цудоўныя ўзоры мэблі ХІХ – пачатку ХХ ст., упрыгожаныя разьбой, можна ўбачыць і ў Музеі Максіма Багдановіча: падлогавы гадзіннік, буфет, самаварны столік, кніжную шафу і, безумоўна, наша знакамітае «чароўнае» люстэрка.
